14. maí 2012

Vorferð

Vorferð foreldrafélags Uglukletts

Miðvikudaginn 16. maí ætlar Foreldrafélagið að bjóða börnum, foreldrum og starfsfólki í vorferð.

Foreldrar þurfa að borga rútugjald kr. 1000 fyrir sig, börn og starfsfólk fá frítt.

Ferðinni er heitið að Háafelli til Jóhönnu þar sem við ætlum að skoða geiturnar hennar.

Lagt verður af stað frá Uglukletti kl. 9.30 og ráðgert að koma aftur til baka í kringum 12.00, þá verður grillveisla í Uglukletti.

Foreldrar eru vinsamlegast beðnir að skrá sig í ferðina í svo hægt sér að panta nógu stóra rútu.

Kveðja foreldrafélagið

4. maí 2012

Styrkur úr Sprotasjóði

 Ugluklettur sótti um styrk úr Sprotasjóði snemma á þessu ári. Sprotasjóður er á vegum Mennta- og menningarmálaráðuneytisins og  hefur það hlutverk að styðja við þróun og nýbreytni í skólastarfi. Hann veitir leik-, grunn- og framhaldsskólum styrki í þeim tilgangi. Að þessu sinni voru áherslur sjóðsins á þróun skólanámskrár með hliðsjón af nýrri menntastefnu og virkt lýðræði, mannréttindi og samskipti í skólum.

Ugluklettur sótti um styrk til þess að móta nýja skólanámská, það kemur fram í umsókninni að markmið verkefnisins sé meðal annars ,,... að vinna námskrá sem sameinar áherslur skólans um nýja nálgun í skólastarfi og grunnþætti menntunar. Að vinna verkefnið í samvinnu við börn, starfsfólk og foreldra, þannig að grunnur sé lagður að námi þeirra barna sem skólan sækja á grundvelli samvinnu þeirra sem að skólanum koma. Að móta skýra sín til framtíðar sem börn, starfsfólk og foreldrar geta sameinast um".

Ugluklettur fékk úthlutað 900.000.-til verkefnisins og hafist verður handa næsta haust í við vinnu þess.

Við í Uglukletti hlökkum til að vinna þetta spennandi verkefni með börnum og foreldrum.

24. apríl 2012

Ráðning leikskólastjóra

Á fundi sveitastjórnar í seinustu viku var gengið frá ráðningu leikskólastjóra hér í Uglukletti. Hún Kristín okkar Gísladóttir var ráðin í starfið. Mikil ánægja er í leikskólanum með þessa ráðningu og nú getur starfsfólk skólans einbeitt sér að því að móta starf skólans og skrá það í  skólanámskrá. Það eru spennandi tímar framundan í Uglukletti. 

17. apríl 2012

Náms- og kynnisferð starfsmanna

Í nótt halda starfsmenn leikskólans af stað í náms- og kynnisferð til Danmerkur. Hópurinn mun skoða tvo leikskóla og vísindasafn. Einnig gefst tækifæri til þess að njóta lífsins og hafa svolítið gaman. Af þessum sökum er leikskólinn lokaður miðvikudaginn 18. apríl og föstudaginn 20. apríl. Við vonum að allir njóti þessarar löngu helgar og hlökkum til þess að sjá ykkur hress á mánudaginn.

3. apríl 2012

Atburðadagatal

 Nú er dagatal fyrir apríl komið inn á heimasíðuna svo og matseðill. Við vekjum athygli á dótadegi, vorskóla fyrir Fálkana og minnum svo foreldra á náms- og kynnisferð starfsmanna til Kaupmannahafnar. Vegna ferðarinnar verðu leikskólinn lokaður miðvikudaginn 18. apríl og föstudaginn 20. apríl.

19. mars 2012

Tré í garðinum

 Í seinustu viku vorum við svo heppinn að Dóri Sig. lét okkur hafa nokkur tré í garðinn. Þessi tré nýtast mjög vel við leik og störf og koma sér vel þegar hugmyndaríkir krakkar eru á ferð.

16. mars 2012

Gulur, rauður

Í vikunni höfum við einbeitt okkur að litunum gulum og rauðum. Börnin hafa staðið sig vel í að klæða sig eftir litunum og við höldum áfram í næstu viku með litina grænan og bláan.

Einn af fálkahópunum fór í grunnskólann í vikunni, heimsóknirnar hafa gengið vel og börnin verið mjög ánægð. Fleiri heimsóknir eru framundan.

Í næstu viku hafa foreldrar þeirra barna sem eru í fálkahóp og útskrifast í vor verið boðaðir á fund til að fara yfir komandi vikur. Við vonum að sem flestir foreldrar sjái sér fært að mæta. Fundurinn er þriðjudaginn 20. mars kl: 9.00.

Óskum ykkur góðrar helgar, sjáumst hress í næstu viku. 

23. febrúar 2012

Öskudagur

Í gær var mikið fjör hjá okkur, hér voru kónuglóarmenn, bósi ljósár, sjóræningjar, prinsessur, ljósálfar, nornir og ýmiskonar aðrar verur. Við slógum köttinn úr tunnunni, fegnum okkur pítsu í hádeginu og skemmtum okkur vel.

Myndir eru komnar inn á síðuna frá bolludegi, sprengidegi og öskudegi. Allt í einni möppu.